2 fevral 2019-cu il tarixdə GS1 Azerbaijan Cəmiyyətinin ofisində GS1 sistemin qeydiyyatdan
keçmiş yeni istifadəçilər üçün "Ştrixli kodlardan istifadə qaydaları" mövzusunda növbəti
seminar-prezentasiya keçirilmişdir. Seminarda müxtəlif çeşidli məhsullar istehsal edən
20-yə yaxın istifadəçi iştirak etmişdir. Onların arasında, qida məhsulları, alkoqollu və
alkoqolsuz içkilər, kimyəvi məişət məhsulları, sənaye məhsulları istehsal edən şirkətlər
və fərdi sahibkarlardır. GS1 Azerbaijan əməkdaşları beynəlxalq GS1 sisteminin fəaliyyəti ,
GTİN və GLN nömrələrinin paylanması prinsipləri, istifadəçilərin www.gs1az.org saytında
yerləşən şəxsi kabinetlərindən işləmək və sifarişlərin düzgün doldurulma qaydaları
haqqında ətraflı danışdılar. Seminar iştirakçılarına GS1 standartlarına cavab verməyən
ştrixkodları olan məhsullar (ölçüsü, rəngi, yeri, ştrixkodun tipi), məhsulların üzərinə vurulan
etiketlərin hazırlanması zamanı mətbəə dizaynerlərinin yol verdiyi tipik səhvlər nümayiş etdirildi.
İştirakçılar GEPİR axtarış sistemi və "GS1 Azerbaijan AZE Barcode" mobil həlli ilə tanış oldular.
Seminarın sonunda ştrixli kodlaşdırma haqqında əsas biliklərin möhkəmləndirilməsi üçün test
keçirildi, həmçinin ştrixkod və radiotezlik identifikasiya avadanlığının iş prinsipi nümayiş olundu.
GS1 Azerbaijan Cəmiyyətinin baş direktoru Vəfa Əliyev GS1 sistemində yeni qeydiyyatdan
keçən istifadəçilərə Şəhadətnamələr təqdim etdi. Əvvəlcədən hazırlanmış metodik materiallar
paylandı.