3 noyabr 2023-cü il tarixində “Qlobal Standart 1 Beynəlxalq SistemininTəbliği” İctimai Birliyinin ofisində müxtəlif istehlak məhsulları istehsal edən 15 müəssisə nümayəndələri və fərdi sahibkarlar üçün növbəti seminar-təqdimat təşkil edilmişdir.Tədbir Birliyin Baş Direktoru Vəfa Əliyevin salamı ilə başlamışdır və Əmtəə Nömrələmə Depozitariyasının müdiri Gülanə Rəsulovanın çıxışı ilə davam etmişdir. 

Seminar-təqdimatın əsas mövzuları GS1 sistemi, onun məqsəd və vəzifələri, ştrixkodun həm yerli, həm də dünya bazarında rolu, GS1 standartları və onların düzgün tətbiqi haqqında olmuşdur. Tədbir  iştirakçıları üçün ştrixkoddan istifadə zamanı diqqət etməli olduqları nüanslar xüsusi vurğulanmışdır. Xüsusilə, kənd təsərrüfatı məhsullarının istehsalçılarını və tədarükçülərini maraqlandıran izlənmə məsələsi ətraflı müzakirə olunmuşdur. GS1 identifikatorlarının məhsulun müxtəlif istehsal mərhələlərində necə istifadə olunması barədə məlumatlar verilmişdir. 
Tədbir iştirakçıları anbar əməliyyatlarının asanlaşdırılması və 
sürətləndirilməsi üçün logistik kodlar və logistik etiketlər haqqında məlumat 
əldə etmişdir. 

Daha sonra GS1 beynəlxalq sistemindən istifadə edən “Verified by GS1” axtarış platforması geniş müzakirə olunmuşdur. Seminar-təqdimatın iştirakçılarına yaxın vaxtlarda mobil telefonlarda istifadəyə veriləcək yeni “GS1 Azerbaijan AZE Barcode” mobil tətbiqi haqqında məlumat verilmişdir ki, bu da yerli və idxal olunan mallar və onların istehsalçıları haqqında məlumat əldə etməyə imkan verəcək.  

Tədbirdə İctimai Birliyin informasiya texnologiyaları üzrə aparıcı mütəxəssisi Fərid Abasov ştrixkod vasitəsilə uçot və inventarizasiya prosesinin aparılması barədə danışmış, həmçinin ştrix kodlaşdırma avadanlığını nümayiş etdirmişdir. İştirakçılar tərəfindən maraqla qarşılanan tədbirin sonunda bir sıra suallara cavablar verilmiş, sahibkarların pərakəndə satış şəbəkələrində məhsullarını tanıdarkən üzləşdikləri çətinliklərlə bağlı iştirakçıların şikayətləri dinlənilmişdir.

Sahibkarların ştrixkod sahəsində üzləşdikləri problemlərlə yerində tanış olmaq və həlli məqsədilə təşkil olunacaq növbəti seminar - təqdimatlarda “Azərbaycan Respublikasının Qida Təhlükəsizliyi Agentliyi”  (AQTA), “Azərbaycan Respublikasının Kiçik və Orta Biznesin İnkişafı Agentliyi” (KOBİA) və digər aidiyyatı orqanların nümayəndələrinin iştirakı üçün dəvət  nəzərdə tutulmuşdur.

Tədbirin sonunda “Qlobal Standart 1 Beynəlxalq Sisteminin Təbliği” İctimai Birliyinin iştirakçı-üzvlərinə GS1 sisteminin ştrix-kodlarından istifadə hüquqlarını təsdiq edən sertifikatlar təqdim edilmiş və xatirə şəkilləri çəkilmişdir.